Best Web Hosting Provider In India 2024
Kalki 2898 AD Box Office Collection: “కల్కి 2898 ఎ.డి” థియేటర్లలో మొదటి 15 రోజుల్లో గణనీయమైన విజయాన్ని సాధించింది. భారతదేశం అంతటా రూ .543.35 కోట్ల నికర వసూళ్లను రాబట్టింది. అయితే, 16వ రోజు కూడా మంచి కలెక్షన్స్‌నే అందుకుంది కల్కి 2898 ఏడీ సినిమా.
హిందీ నుంచే ఎక్కువ
అన్ని భాషల్లో కలిపి ఈ చిత్రం 16వ రోజున రూ. 5.4 కోట్ల ఇండియా నెట్ కలెక్షన్స్‌ను రాబట్టినట్లు బాలీవుడ్ ట్రేడ్ వర్గాలు తెలిపాయి. వీటిలో తెలుగు నుంచి రూ. 1.5 కోట్లు, తమిళం నుంచి 15 లక్షలు, హిందీ నుంచి 3.45 కోట్లు, కన్నడ నుంచి 5 లక్షలు, మలయాళం నుంచి 25 లక్షలుగా వసూళ్లు ఉన్నాయి.
ఇండియా కలెక్షన్స్
ఇక మొత్తం 15 రోజుల్లో కల్కి 2898 ఏడీ చిత్రానికి రూ. 550.24 కోట్ల నెట్ ఇండియా కలెక్షన్స్ వచ్చినట్లు సినీ వర్గాలు తెలుపుతున్నాయి. ఇది కేవలం ఒక ఇండియాలోని కలెక్షన్స్ మాత్రమే. అదే వరల్డ్ వైడ్‌గా అయితే, రూ. 906. 85 కోట్లు గ్రాస్ రాబట్టినట్లు పలు సంస్థలు తెలిపుతున్నాయి. కానీ, మూవీ మేకర్స్ మాత్రం మరోలా కలెక్షన్స్ వివరాలు ఇచ్చారు.
అదిరిపోయిన పోస్టర్
కల్కి 2898 ఏడీ సినిమాకు రూ. 1000 కోట్లు వచ్చినట్లు మేకర్స్ పోస్టర్ రిలీజ్ చేశారు. అందులో ప్రభాస్ కర్ణుడిగా ఉన్న ఫొటోను షేర్ చేశారు. అలాగే కల్కికి వెయ్యి కోట్లు రావడమే కాకుండా ఇంకా కౌంటింగ్ అవుతోందని వారు తెలిపారు. “ఇంత పెద్ద మైల్ స్టోన్ దాటింది కేవలం మీ ప్రేమ వల్లే. మేము మా మనసు పెట్టి సినిమా తీశాం. మీరు అంతే హృదయపూర్వకంగా ప్రేమను చూపించారు. ప్రపంచవ్యాప్తంగా ఉన్న ప్రేక్షకులందరికీ కృతజ్ఞతలు” అని మేకర్స్ పోస్టర్‌కు క్యాప్షన్ రాసుకొచ్చారు.
లేని ఇండియన్ 2 ప్రభావం
కాగా 15 రోజుల్లోనే కల్కి సినిమా వెయ్యి కోట్లు అర్జించిందని ప్రముఖ ట్రేడ్ అనలిస్ట్ రమేష్ బాలా తన ఎక్స్ అకౌంట్‌లో చెప్పడం గమనార్హం. తాజాగా 16 రోజుల్లో వెయ్యి కోట్లు కలెక్ట్ చేసిందని మేకర్స్ అధికారికంగా ప్రకటించడం విశేషంగా మారింది. ఏది ఏమైనా ఇండియన్ 2 సినిమా విడుదలైనప్పటికీ కల్కి జోరు మాత్రం తగ్గట్లేదు. ఇలా చూస్తే కల్కిపై భారతీయుడు 2 ప్రభావం ఏమాత్రం లేనట్లు తెలుస్తోంది.
ఫస్ట్ సౌత్ ఇండియన్ మూవీగా కల్కి
అలాగే నార్త్ అమెరికాలో కల్కి సినిమాకు 17 మిలియన్ డాలర్లకు పైగా కలెక్షన్స్ వచ్చినట్లు రమేష్ బాలా తెలిపారు. దీంతో నార్త్ అమెరికాలో ఇలాంటి రికార్డ్ క్రియేట్ చేసిన ఫస్ట్ సౌత్ ఇండియన్ సినిమాగా కల్కి నిలిచిందని ఆయన ఎక్స్‌లో రాసుకొచ్చారు. ఇప్పటికీ నార్త్ అమెరికాలో కల్కి 17,031,645 మిలియన్ డాలర్స్ వసూలు చేసింది.
ఇంకా 5 కోట్లు
ఇదిలా ఉంటే, కల్కి 2898 ఏడీ నిర్మాతలకు ఇప్పటికీ రూ. 95.09 కోట్ల లాభం వచ్చిందని ప్రముఖ ట్రేడ్ సంస్థలు చెబుతున్నాయి. అంటే వంద కోట్ల లాభానికి ఇంకా 5 కోట్లు కావాల్సి ఉంది. ఇక తెలుగు రాష్ట్రాల్లో 16వ రోజున కల్కి రూ. 96 లక్షల షేర్ కలెక్షన్స్ మాత్రమే వచ్చినట్లు సమాచారం. అలాగే 17వ రోజు ఈ చిత్రానికి ఇండియా వ్యాప్తంగా రూ. 1.49 కోట్లు వచ్చే అవకాశం ఉందని ట్రేడ్ అనలిస్ట్‌లు అంచనా వేశారు.
