Sabarmati Express : పట్టాలు తప్పిన సబర్మతి ఎక్స్​ప్రెస్​.. భారీ బండరాయి తగిలి!

దేశంలో మరో రైలు ప్రమాదం జరిగింది. యూపీలోని కాన్పూర్​ స్టేషన్​కి సమీపంలో సబర్మతి ఎక్స్​ప్రెస్​ ప్యాసింజర్​ ట్రైన్​ పట్టాలు తప్పింది. ఈ ఘటనలో అనేక బోగీలు పట్టాలు తప్పాయి. అయితే తాజా రైలు ప్రమాదంలో ఎలాంటి ప్రాణనష్టం జరగలేదు.

కానీ ఆ ప్రాంతంలో రైలు సేవలకు అంతరాయం ఏర్పడింది.

పట్టాలు తప్పిన సబర్మతి ఎక్స్​ప్రెస్​..

ఉత్తరప్రదేశ్​లోని కాన్పూర్- భీమ్​సేన్ స్టేషన్ల మధ్య బ్లాక్ సెక్షన్​లో శనివారం తెల్లవారుజామున 19168 నంబరు గల సబర్మతి ఎక్స్ ప్రెస్ పట్టాలు తప్పింది. అయితే ఈ ఘటనలో ఎవరికీ ఎలాంటి గాయాలు కాలేదు.

రైల్వే ట్రైన్ ఎంక్వైరీ వెబ్సైట్ ప్రకారం.. భీమ్​సేన్​ సమీపంలోని కాన్పూర్ సెంట్రల్ రైల్వే స్టేషన్ నుంచి బయలుదేరిన అరగంట తర్వాత, తెల్లవారుజామున 2:32 గంటలకు రైలు పట్టాలు తప్పింది.

మరోవైపు కాన్పూర్​కు ప్రయాణికులను తరలించేందుకు వీలుగా భారతీయ రైల్వే బస్సులను ఇప్పటికే ఘటనాస్థలానికి పంపించింది. బస్సుల ద్వారా సబర్మతీ ఎక్స్​ప్రెస్​ ప్రయాణికులను కాన్పూర్​కి తీసుకెళ్లి, అక్కడి నుంచి ప్రత్యేక రైలు ద్వారా గమ్యస్థానానికి చేరుస్తామని అధికారులు వెల్లడించారు.

సబర్మతి ఎక్స్​ప్రెస్​ రైలు యూపీ వారణాసి నుంచి గుజరాత్​లోని అహ్మదాబాద్​ వరకు సేవలను అందిస్తుంది.

మరోవైపు అగ్నిమాపక సిబ్బంది, అంబులెన్స్​లు సైతం ఘటనాస్థలానికి చేరుకున్నాయి. క్షుణ్ణంగా పరిశీలించిన అనంతరం ప్రయాణికుల్లో ఎవరికీ గాయాలు అవ్వలేదని నిర్థరించారు.

ప్రమాదం ఎలా జరిగింది..?

డ్రైవర్ ప్రాథమిక సమాచారం ప్రకారం, ఒక బండరాయి ఇంజిన్​ను బలంగా తాకిందని. ఇది ఇంజిన్ క్యాటిల్​ గార్డుకు గణనీయమైన నష్టాన్ని కలిగించింది. అనంతరం సబర్మతి ఎక్స్​ప్రెస్​ బోగీలు పట్టాలి తప్పాయి.

ఈ ఘటనపై భారతీయ రైల్వే దర్యాప్తు చేస్తోంది.

సంబంధిత స్టేషన్లకు ఎమర్జెన్సీ హెల్ప్ లైన్ నంబర్లను అధికారులు జారీ చేశారు:

1. PRYJ: 0532-2408128, 0532-2407353, 0532-2408149 CNB: 0512-2323018, 0512-2323016, 0512-2323015

2. MZP: 0544-2220097

3. FTP: 7392964622

4. NYN: 0532-2697252

5. CAR: 8840377893

6. ETW: 7525001249

7. HRS/ASM: 7525001336

8. PHD: 7505720185

దేశంలో ఈ మధ్య కాలంలో రైలు ప్రమాదాల సంఖ్య ఆందోళనకరంగా పెరుగుతోంది. దేశంలోని ఏదో ఒక మూల రైలు పట్టాలు తప్పిన ఘటనలు నిత్యం వార్తల్లో నిలిచి, ప్రజలను భయపెడుతున్నాయి. కొన్ని రోజుల క్రితమే ఝార్ఖండ్​లో హౌరా ఎక్స్​ప్రెస్​కి చెందిన 18 బోగీలు పట్టాలు తప్పింది. ఈ ఘటనలో ఇద్దరు మరణించారు. ఐదుగురు గాయపడ్డారు. అంతకుముందు జూన్​లో పశ్చిమ్​బెంగాల్​లో ఓ గూడ్స్​ రైలు- కాంచన్​జంగ ప్యాసింజర్​ రైలు పరస్పరం ఢీకొన్నాయి.ఈ రైలు ప్రమాదంలో 11మంది మరణించారు. మరో 60మంది ప్రయాణికులు గాయపడ్డారు.

రైలు ప్రయాణం ఇక ఏమాత్రం సురక్షితం కాదన్న అభిప్రాయాలు ప్రజల నుంచి వెలువడుతోంది. రైలు ప్రమాదాలు జరగకుండా మరిన్ని చర్యలు చేపట్టాలని ప్రభుత్వాన్ని ప్రజలు డిమాండ్​ చేస్తున్నారు.