PM Narendra Modi: డొనాల్డ్ ట్రంప్ కు అభినందనలు తెలిపిన ప్రధాని మోదీ; ఇద్దరూ మంచి ఫ్రెండ్స్

Donald Trump wins: అమెరికా 47వ అధ్యక్షుడిగా ఎన్నికైన డొనాల్డ్ ట్రంప్ కు శుభాకాంక్షలు తెలుపుతూ ప్రధాని నరేంద్ర మోదీ ట్వీట్ చేశారు. ‘‘చారిత్రాత్మక ఎన్నికల్లో విజయం సాధించిన నా మిత్రుడు డొనాల్డ్ ట్రంప్ కు హృదయపూర్వక అభినందనలు. మీ మునుపటి పదవీకాలం యొక్క విజయాలను మీరు నిర్మించేటప్పుడు, భారత్-యూఎస్ సమగ్ర గ్లోబల్, వ్యూహాత్మక భాగస్వామ్యాన్ని మరింత బలోపేతం చేయడానికి మా సహకారాన్ని పునరుద్ధరించడానికి నేను ఎదురు చూస్తున్నాను’’ అని మోదీ ఎక్స్ లో పోస్ట్ చేశారు.

ఇద్దరూ మంచి ఫ్రెండ్స్

డోనాల్డ్ ట్రంప్, నరేంద్ర మోదీ మధ్య మంచి స్నేహ సంబంధాలు ఉన్నాయి. 2020 అమెరికా అధ్యక్ష ఎన్నికల్లో ట్రంప్ కు ఓటు వేయాలని మోదీ బహిరంగంగానే పిలుపునిచ్చారు. వారిద్దరి మధ్య బలమైన దౌత్య సంబంధాలు, వ్యూహాత్మక సహకారం, గాఢమైన వ్యక్తిగత స్నేహం ఉన్నాయి. 2019లో హ్యూస్టన్ లో ‘హౌడీ మోదీ’, 2020లో అహ్మదాబాద్లో ‘నమస్తే ట్రంప్’ వంటి భారీ కార్యక్రమాల్లో వీరిద్దరు కలిసి పాల్గొని, తమ స్నేహాన్ని ప్రదర్శించారు. హ్యూస్టన్ లో ఘనంగా జరిగిన ‘హౌడీ మోదీ’ కార్యక్రమాన్ని ట్రంప్ ఈ మధ్య కూడా గుర్తు చేసుకున్నారు. వ్యూహాత్మకంగా డోనాల్డ్ ట్రంప్, నరేంద్ర మోదీ రక్షణ, భద్రత విషయంలో సన్నిహితంగా మెలిగారు. ఉగ్రవాదానికి వ్యతిరేకంగా ఇరువురు నేతలు కఠిన వైఖరిని పంచుకున్నారు. ఇది ఇరదేశాల సంబంధాలను బలోపేతం చేసింది.

వాణిజ్యంలో దెబ్బ..

అయితే, ట్రంప్ హయాంలో భారత్ తో అమెరికా వాణిజ్య సంబంధాలు మాత్రం దెబ్బతిన్నాయి. డోనాల్డ్ ట్రంప్ ‘అమెరికా ఫస్ట్’ విధానం సుంకాల విషయంలో వివాదాలకు దారితీయగా, అమెరికా భారత వస్తువులపై సుంకాలు విధించడంతో, భారత్ దీటుగా స్పందించింది. అయినప్పటికీ, ఇరు దేశాలు న్యాయమైన వాణిజ్యం కోసం కృషి చేశాయి. కోవిడ్ -19 మహమ్మారి సమయంలో, ఇండో యూఎస్ సంబంధాలు ఆరోగ్య సహకారానికి విస్తరించాయి. భారతదేశం అమెరికాకు హైడ్రాక్సీ క్లోరోక్విన్ ను సరఫరా చేసింది.