వైయ‌స్ జ‌గ‌న్ ప‌రామ‌ర్శ‌పై ఆనం అర్ధం లేని ఆరోపణలు 

తిరుపతి: తిరుపతి తొక్కిసలాటలో గాయపడి, ఆస్పత్రిలో చికిత్స పొందుతున్న వారిని మాజీ ముఖ్యమంత్రి, వైయస్ఆర్‌సీపీ అధ్యక్షులు వైయస్‌ జగన్‌మోహన్‌రెడ్డి పరామర్శించిన సందర్భంగా ఆయనపై మంత్రి ఆనం రామ‌నారాయ‌ణ‌రెడ్డి అర్ధం లేని ఆరోపణలు చేశార‌ని వైయ‌స్ఆర్‌సీపీ తిరుపతి జిల్లా అధ్యక్షుడు, టీటీడీ మాజీ ఛైర్మన్‌ భూమన కరుణాకర్‌రెడ్డి మండిప‌డ్డారు. మంత్రి ఆనం విమర్శలకు భూమన ధీటుగా బ‌దిలిచ్చారు. కూట‌మి నేత‌లు చేస్తున్న విష ప్ర‌చారాన్ని ఆయ‌న తీవ్రంగా ఖండించారు. ఈ మేరకు శ‌నివారం క‌రుణాక‌ర్‌రెడ్డి ఓ వీడియో సందేశాన్ని మీడియాకు షేర్ చేశారు.  

భూమన కరుణాకర్‌రెడ్డి ఏమన్నారంటే..:
    ‘మంత్రి ఆనం రామనారాయణరెడ్డి మీడియాతో మాట్లాడుతూ మాపై చేసిన ఆరోపణలు దారుణంగా ఉన్నాయి. నిజానికి మీ నిర్వాకం వల్ల 6గురు మరణిస్తే, నైతిక బాధ్యత వహించి రాజీనామా చేయాల్సింది పోయి, జగన్‌ గారిపై ఆరోపణలు చేశారు. ఇది కచ్చితంగా మీరు స్ధాయి దిగజారి మాట్లాడటమే. ఇంత హీనంగా మాట్లాడగలనని మీకు మీరు  నిరూపించుకున్నారు. మీ మాటలతో తొక్కిసలాటలో మరణించిన వారి బంధువులు, క్షతగాత్రులను దారుణంగా అవమానించారు’.
    ‘తొక్కిసలాట బాధితులపై సానుభూతి చూపాల్సింది పోయి, పరామర్శించి ఆర్ధిక సాయం చేయాల్సింది పోయి, మేం డబ్బులిచ్చి మిమ్మల్ని తిట్టించడానికి వాడుకున్నామనడం రాజకీయం కాదా?. దీన్ని బట్టే ఎవరు రాజకీయం చేస్తున్నారో తేటతెల్లం అవుతోంది. మీకు క్షతగ్రాత్రుల మీద కూడా సదభిప్రాయం లేదని అర్ధమవుతోంది. వారు మీ గురించి మాట్లాడలేదని మీరు ఇలా మాట్లాడుతారా? మీ అస్తిత్వానికి ఇబ్బంది వస్తుందని ఇలా ఆరోపణలు చేస్తారా?’.
    ‘మాజీ ముఖ్యమంత్రి వస్తుంటే ట్రాక్టర్లు అడ్డుపెట్టి అడ్డుకోవాలనుకోవడం దారుణం కాదా?. కనీస భధ్రత ఇవ్వాలని కూడా తెలియదా?. జగన్‌గారు ఆస్పత్రికి వస్తున్నారని తెలిసి కూడా డిప్యూటీ సీఎం పవన్‌ కళ్యాణ్‌ అంతసేపు అక్కడెందుకు ఉన్నారు?. అది కావాలనే  ఉద్దేశపూర్వకంగా చేసింది కాదా?. జగన్‌ గారు ఆసుపత్రికి రాకుండా కుట్ర చేసిన మాట నిజం కాదా?’.
    ‘మిమ్మల్ని తిట్టించడం కోసం మేం ఆస్పత్రిలో డబ్బులిచ్చామన్నది సీసీ కెమెరాలో రికారై్డందని అంటున్నారు కదా?. ఆనం రామనారాయణ రెడ్డిగారికి సవాల్‌ చేస్తున్నాం. తొక్కిసలాట క్షతగాత్రులతో మిమ్మల్ని తిట్టించడం కోసమే మేము వారికి డబ్బులు ఇచ్చామంటున్నారు కదా!. ఒకవేళ అది నిజమైతే, మీకు నిజంగా దేవుడిపై భక్తి కలిగి ఉంటే మేం కేవలం మిమ్మల్ని తిట్టించడం కోసమే తొక్కిసలాట క్షతగాత్రులకు డబ్బులిచ్చినట్లు మీరు నిరూపించాలి. ఆ పని చేయలేకపోతే వెంటనే మీ పదవికి రాజీనామా చేయాలి’.
    ‘నిజానికి జగన్‌గారు వచ్చేవరకు మమ్మల్ని ఆసుపత్రివైపు మీ పోలీసులు, అధికార గణం వెళ్లనీయలేదు. ఆ విషయం గుర్తుంచుకొండి. చంద్రబాబు పాలనపై ప్రజలకు ఏ అభిప్రాయం ఉందో ఇప్పటికే అందరికీ  అర్ధమవుతోంది. మీరు దేవాదాయ శాఖ మంత్రిగా ఉన్నా.. మీ పార్టీలో ఎవరూ గుర్తించడం లేదనే మీరు, ఇలా ఆరోపణలు చేశారనేది స్పష్టంగా అర్ధమవుతోంది’ అంటూ వీడియో సందేశంలో భూమ‌న పేర్కొన్నారు.