బాలీవుడ్ సీనియర్ యాక్టర్ పరేశ్ రావల్, ఆదిల్ హుసేన్ ప్రధాన పాత్రల్లో ‘ది స్టోరీటెల్లర్’ చిత్రం రూపొందింది. బెంగాలీ దిగ్గజ రచయిత, దర్శకుడు సత్యజిత్ రే రచించిన ఓ కథ ఆధారంగా ఈ మూవీ రూపొందింది. దీంతో ఈ మూవీపై ముందు నుంచి కొందరు ప్రేక్షకుల్లో ఆసక్తి నెలకొంది. నేడు (జనవరి 28) స్ట్రీమింగ్‍కు ఈ చిత్రం రావాల్సి ఉంది. అయితే, మధ్యాహ్న సమయానికి కూడా రాకపోవటంతో నెటిజన్లు సోషల్ మీడియాలో ప్రశ్నించారు. అయితే, ఎట్టకేలకు సాయంత్రం ఈ చిత్రం ఓటీటీలో అడుగుపెట్టింది.

సినిమా ఎక్కడ అంటూ..

ది స్టోరీటెల్లర్ చిత్రాన్ని జనవరి 28వ తేదీన స్ట్రీమింగ్‍కు తీసుకురాన్నట్టు డిస్నీ+ హాట్‍స్టార్ ఓటీటీ ప్రకటించింది. దీంతో ఈ చిత్రం కొందరు వేచిచూశారు. అయితే, నేడు మధ్యాహ్నం అయినా ఇంకా ఈ మూవీ హాట్‍స్టార్‌లో అందుబాటులోకి రాలేదు. ఈ చిత్రం పేజ్ ఎర్రర్ చూపించింది. దీంతో ప్రేక్షకుల్లో మరింత కన్‍ఫ్యూజన్ నెలకొంది. ఈ మూవీ స్ట్రీమింగ్‍కు అందుబాటులోకి రాకపోవడంపై సోషల్ మీడియాలో నెటిజన్లు కొందరు పోస్టులు చేశారు. ది స్టోరీటెల్లర్ చిత్రం ఎక్కడా అంటూ హాట్‍స్టార్‌ను ట్యాగ్ చేసి ప్రశ్నించారు.

స్ట్రీమింగ్ షురూ

కాస్త ఆలస్యంగా నేటి సాయంత్రానికి ది స్టోరీటెల్లర్ చిత్రాన్ని డిస్నీ+ హాట్‍స్టార్ ఓటీటీ స్ట్రీమింగ్‍కు తీసుకొచ్చింది. ఈ మూవీ థియేటర్లలో కాకుండా నేరుగా ఓటీటీలోకే స్ట్రీమింగ్‍కు వచ్చింది. హిందీలో స్ట్రీమింగ్ అవుతోంది.

షార్ట్ స్టోరీ ఆధారంగా..

లెజెండరీ రైటర్, డైరెక్టర్ సత్యజిత్ రే రచించిన ఐకానిక్ షార్ట్ స్టోరీ ‘గోల్పో బోలో తరిని ఖురో’ ఆధారంగా ది స్టోరీటెల్లర్ మూవీ రూపొందింది. స్నేహం, వ్యక్తిత్వం, మోసం అంశాల చుట్టూ ఈ స్టోరీ సాగుతుంది. హృదయాన్ని తాకేలా ఈ కథ ఉంటుంది. ఈ మూవీకి అనంత్ నారాయణన్ మహదేవన్ దర్శకత్వం వహించారు.

ది స్టోరీటెల్లర్ మూవీలో పరేశ్ రావల్‍, ఆదిల్ హుసేన్ సహా అనిందిత బోస్, రేవతి, తనిష్ఠ ఛటర్జీ, జయేశ్ మోర్, రోహిత్ ముఖర్జీ కీలకపాత్రలు పోషించారు. జ్యోతి దేశ్‍పాండే, సలిల్ చతుర్వేది, సచ్ఛేంద్ర ఛటర్జీ, శుభ శెట్టి ఈ మూవీని నిర్మించారు. ఈ చిత్రానికి హృజు రాయ్ మ్యూజిక్ ఇచ్చారు.

ఈ వారమే ది సీక్రెట్ ఆఫ్ ది శీలేదార్స్

డిస్నీ+ హాట్‍స్టార్ ఓటీటీలో జనవరి 31వ తేదీన ది సీక్రెట్ ఆఫ్ ది శీలేదార్స్ వెబ్ సిరీస్ స్ట్రీమింగ్‍కు రానుంది. ఈ సిరీస్‍పై ఇంట్రెస్ట్ బాగానే ఉంది. ఛత్రపతి శివాజీ మహరాజ్ ఖజానా చుట్టూ ఈ సిరీస్ సాగుతుంది. రాజీవ్ ఖండేవాల్, సాయి తంహనకర్ ఈ సిరీస్‍లో ప్రధాన పాత్రలు పోషించారు. ఆశిష్ విద్యార్థి, గౌరవ్ అమ్లానీ కీరోల్స్ చేశారు. ముంజ్య మూవీ ఫేమ్ డైరెక్టర్ ఆదిత్య సర్పోర్ట్‌దార్ ఈ సిరీస్‍ను తెరకెక్కించారు. ఇటీవలే వచ్చిన ట్రైలర్ ఆకట్టుకుంది. ఈ సిరీస్‍ను ధనలక్ష్మీ క్రియేషన్స్ పతాకంపై నితిన్ వైద్య ప్రొడ్యూజ్ చేశారు. జనవరి 31 నుంచి హాట్‍స్టార్ ఓటీటీలో ది సీక్రెట్ ఆఫ్ ది శీలేదార్స్ సిరీస్ చూడొచ్చు.