మనం అనుసరిస్తున్న జీవనశైలి, ఆహారపు అలవాట్ల కారణంగా అనేక రకాల ఆరోగ్య సమస్యలను ఎదుర్కొంటున్నాం. దీనివల్ల, 30 నుండి 40 ఏళ్ళు దాటిన తర్వాత, అనేక వ్యాధుల బారిన పడుతున్నాము. మన జీవనశైలిలో మార్పు వచ్చేకొద్దీ, వచ్చే వ్యాధుల సంఖ్య కూడా పెరుగుతోంది. వీటి నుంచి తక్షణం ఉపశమనం పొందాలనే ఆలోచనతో వైద్యులను సంప్రదించి, మందులు వాడుతున్నాము. కానీ వాటిలో కొన్ని దుష్ప్రభావాలను కలుగజేస్తాయి. వాటిల్లో తలకు సంబంధించి వాడే కెమికల్స్ విషయంలో కాస్త తేడా వచ్చిందంటే, చాలా సమస్యలు ఎదుర్కోవాల్సి వస్తుంది.

వాస్తవానికి, ఈ సమస్యలు చిన్నగా ఉన్నప్పుడే ఇంట్లో కొన్ని చిట్కాలు పాటించి, సమస్యల నుండి ఉపశమనం పొందొచ్చు. అవి మరింత పెరగకుండా కూడా నిరోధించవచ్చు. అంతేకాకుండా నేటి కాలుష్యం కారణంగా జుట్టు రాలడం వంటి సమస్యలను కూడా ఎక్కువమంది ఎదుర్కొంటున్నాం. దానికి కూడా ఇంట్లోనే కొన్ని పరిష్కారాలను పాటించవచ్చు. కాబట్టి మన శారీరక, మానసిక ఆరోగ్యాన్ని, అందాన్ని కాపాడుకోవడానికి వంటగదిలో ఉండే వస్తువులతో చేయగలిగే పరిష్కారాలను తెలుసుకోవడం ముఖ్యం. అలా ఇక్కడ మనం తెలుసుకోబోయే విషయం పేలు, చుండ్రు సమస్య. తలలో ఉండే పేలు, చుండ్రును తొలగించి సహజసిద్ధమైన ఉపశమనాన్ని, జుట్టుకు సహజ సౌందర్యాన్ని అందించేది వేపాకును ఎలా వాడాలో చూద్దాం.

కావలసిన పదార్థాలు

• నువ్వుల నూనె – ఒక చెంచా
• కొబ్బరి నూనె – ఒక చెంచా
• వేపాకు – ఒక పిడికెడు
• చిన్న ఉల్లిపాయలు – 8
• మెంతులు – ఒక చెంచా
• వెల్లుల్లి – 4 రెబ్బలు
• మిరియాలు – 10

తయారుచేసే విధానం

• వేపాకు, చిన్న ఉల్లిపాయలు, మెంతులు, వెల్లుల్లి, మిరియాలు అన్నీ కలిపి మెత్తగా నూరాలి. రోట్లో కాకుండా, మిక్సీలో నూరితేనే బాగా సున్నితంగా మారుతుంది.
• ఒక ఇనుప కడాయిని పొయ్యి మీద పెట్టి అందులో నువ్వుల నూనె, కొబ్బరి నూనె పోసి నూరిన మిశ్రమాన్ని వేసి బాగా మరిగించాలి.
• ఆ మిశ్రమం ఆకుపచ్చ రంగులోకి మారి, నూనె విడిపోయేంత వరకూ వేడి చేయాలి. అప్పుడే ఈ పదార్థాల సారం అంతా అందులో కలిసిపోతుంది.
• అలా తయారుచేసిన మిశ్రమాన్ని బాగా చల్లారిన తర్వాత వడపోసుకుని, మరొక డబ్బాలోకి మార్చుకోవాలి.

వాడుకునే విధానం

• వారానికి ఒకసారి దీన్ని తీసుకుని తలకు పట్టించాలి. తలకు రాసుకున్న తర్వాత రెండు గంటల పాటు ఆరనిచ్చి స్నానం చేయాలి.
• ఈ మోతాదులో మీరు తయారుచేసుకుంటే అది ఒక నెల వరకు వస్తుంది. ఒక నెల వరకు పాడవకుండా ఉంటే, ఫ్రిజ్‌లో పెట్టుకుని కూడా దీనిని వాడుకోవచ్చు.
• ఒక నెల రోజుల తర్వాత మీ తలలో కలిగిన తేడాను స్పష్టంగా గమనించుతారు కూడా.

పేలు, చుండ్రు సమస్య తీవ్రంగా ఉంటే ఈ చిట్కా సమర్థవంతంగా పని చేస్తుందని చెప్పలేం. ఆరంభంలో ఉన్నప్పుడే దీనికి మందుగా వాడి పరిష్కరించుకోగలం. కేవలం ప్రథమ చికిత్స మాదిరిగానే ఉపయోగపడుతుందని నిపుణులు అభిప్రాయం. సమస్య తీవ్రంగా ఉంటే, ముందుగా వైద్యుడ్ని కలవడమే ఉత్తమం.